النقيب / حمدى شلبى

وقف التاريخ فى رمانة

كانت إحدى مشاكل سعد الشاذلى وهو يخطط لحرب أكتوبر 1973 هى كيف يمنع وصول الدبابات الإسرائيلية إلى قناة السويس قبل استكمال فرد الكباري وعبور الدبابات المصرية إلى الشرق
وأخيرا تقرر الاعتماد على رجال الصاعقة \' الكوماندوز \' لتنفيذ هذه المهمة
وهكذا
كان من ضمن ما تم أن أقلعت ستة طائرات هليوكوبتر مصرية من قاعدة انشاص يوم ستة أكتوبر 1973 فى الساعة السابعة مساء وعليها مائة مقاتل صاعقة بقيادة النقيب / حمدى شلبى
ضابط مصرى صغير ووسيم زى الفرسان والقلب مليان إيمان وحب للخير والإنسان وكراهية وحقد على أبناء الشيطان
عبر برجالته ومهمته كانت إغلاق المحور الساحلى بسيناء الموازى لشط البحر الأبيض المتوسط عند مضيق رمانة اعتبارا من الساعة السادسة صباح سبعة أكتوبر ولمدة 3/ ساعات
وكان معروفا أنها رحلة ذات اتجاه واحد
انشاص رمانة الجنة
رحلة مقدسة وجميلة طلعوها الولاد والقلب مليان إيمان وعناد طلعوا وحالفين ياخدوا بتار الشهدا اللى اتغدر بيهم فى سبعة وستين
ووصلوا الولاد رمانة ويوم سبعة أكتوبر زى ما العباقرة فى القاهرة أتوقعوا الساعة ستة الصبح وصلت الدبابات الإسرائيلية فى طريقها لقناة السويس وبإشارة من حمدى شلبى انفتح ليهم باب لجهنم يوديهم وكانت معركة وملحمة بين الجنود ومعاهم الإيمان وبين المدرعات الصلب وفيها أبناء الشيطان وتم تدمير 18 دبابة واثنين عربة مدرعة و4 عربة نقل وأتوبيس مليان ضباط وجنود يهود وانسحبوا الاندال وبعتوا طيرانهم يقذف المنطقة مع مدفعيتهم بكل ما يملكونة من قذائف ولما أيقنوا أنهم قضوا على كل رجال الصاعقة أرسلوا الدبابات لتعبر المضيق ويطلعوا عليهم الملايكة حمدى شلبى وبقية الشهداء الفدائيين وتدور معركة كبيرة ورهيبة الساعة 12 الظهر ويفشلوا الاندال وينسحبوا بسرعة ويستمروا فى قذف المنطقة بكل الأسلحة والقنابل
إلى الساعة الرابعة عصرا ويوقنون انه لا بد قد تم القضاء على كل البشر وتتقدم سرية مظلات إسرائيلية (مائة فرد مظلات) ودول كريمة الجيش الاسرائيلى حاجة كده زى رامبو الامريكى ويوصلوا المظليين مستخبيين ويقربوا وينفتح تانى باب الجحيم ويطلع المصريين
وتدور معركة بالخناجر والايدين المجردة وحقد ست سنين على شط القنال مستنيين وتار بحر البقر وفلسطين وكل الشهدا اللى أتغدر بيهم فى ستة وخمسين وسبعة وستين كل دول بيصرخوا بالتار وحمدى شلبى مصرى جدع وأمين والتار عرض عند المصريين
وتندفع دباباتهم تحاول تنقذ كرامتهم ورجالتهم وتبدأ الملحمة ويتوقف التاريخ بكل ما فيه من غرائب وعجائب ليسجل لحظة غريبة وعجيبة وفريدة ما تحصلش غير من المصريين
النقيب / على نجم
ضابط مصري من ولاد الفلاحين البسطاء الطيبين ينصاب برصاصة ورغم كده يهجم على دبابة ويطلع فوقها ويفجرها وينفجر فيها ويكون أول استشهادي عليها
ويشوفه العسكرى / عبد الحليم مهنى ويعمل زيه يطلع على دبابة وينفجر فيها
وكانت لحظة غريبة وعجيبة العساكر والضباط المصريين بيجروا ورا الدبابات وأطقم الدبابات الاسرائليين من ذعرهم يهربوا منهم ومن لخمتهم يصطدموا ببعض وينسحبوا الاندال
ويبعتوا الطيران ويبدأوا قذف المدفعية والصواريخ وييجى الليل ويكون استشهد من الأبطال خمسة وسبعين والليل صديق للعشاق والفدائيين
ويقرر حمدى شلبى يرجع بالباقيين بعد ماخلصت الذخيرة ونجحوا فى أداء مهمتهم
ويرجعوا الأبطال ماشيين من خلال سهل الطينة الذى تغوص فيه الأقدام حتى أعلى الركبة يا سلام عليهم وهم راجعين ماشيين خمسة وعشرين كيلو فى الملح والطين وبيغنوا نشيد الفدائيين
وان مت يا امى ما تبكيش
راح أموت علشان بلدي تعيش
افرحى يا أمه وزفينى
وفى يوم النصر افتكريني
وان طالت يا أمه السنين
خلى اخواتى الصغيرين
يكونوا زى فدائيين يا أمه
ولم تتمكن إسرائيل من استغلال المحور إلا فى الساعة الثامنة من صباح 8 أكتوبر اى أن هذه القوة الصغيرة أغلقت هذه المحور لمدة ستة وعشرون ساعة مما يعد إعجازا عسكريا بجميع المقاييس

وقد أشاد الجنرال الاسرائيلى/ أدان بهذه القوة فى مذكراته بعد الحرب وقال عنهم
لقد قاتل رجال الكوماندوز المصريين على المحور الساحلى بكل بسالة وكأنهم قد اقسموا على أن يدفعوا أرواحهم ثمنا لمنعنا من الوصول لقناة السويس
والحق ما شهدت به الأعداء

اسمحوا لى أن انحنى احتراما وإجلالا للرجال
بس أمانة اللى يروح القاهرة ويعرف حمدى شلبى يسلم لى عليه ويبوس لى أيديه وعنيه
ويقوله مصر فاكراك وفى ننى العين والقلب شيلاك

شكرا لانك عرفتنا علي هولاء الابطال

العفو دا واجب